KSÍ hefur birt ársreikning fyrir árið 2021 og fjárhagsáætlun fyrir 2022.

Ársreikningur 2021

Rekstrartekjur KSÍ á árinu 2021 voru um 1.631 mkr eða 4% lægri en áætlanir gerðu ráð fyrir. Styrkir og framlög ársins 2021 voru 2% undir áætlun og þar hafði styrking krónunnar mest áhrif. Annað árið í röð eru tekjur af landsleikjum undir áætlun, en árið 2020 hurfu svo til tekjur af heimaleikjum vegna áhorfendabanns og það sama gildir vegna ársins 2021. Þar spiluðu covid takmarkanir verulega inn í en gert hafði verið ráð fyrir mun hraðari afléttingu en raunin varð. Tekjur af landsleikjum eru þannig 25% lægri en áætlun ársins 2021, eða um 37 milljónum undir áætlun. Sjónvarpstekjur voru einnig undir áætlun sem skýrist af styrkingu krónunnar. Rekstrartekjur Laugardalsvallar voru í samræmi við áætlun.

Rekstrargjöld ársins 2021 voru í heildina um 1.506 mkr, en áætlanir gerðu ráð fyrir því að gjöldin yrðu um 1.520 mkr. Kostnaður landsliða fyrir árið 2021 var 2% undir áætlun, og kostnaður við mótahald og fræðslustarf var lægri en áætlanir gerðu ráð fyrir. Þá var húsnæðiskostnaður undir áætlun og sömu sögu er að segja af öðrum rekstrarkostnaði og rekstrargjöldum Laugardalsvallar. Launakostnaður var undir áætlun þar sem nýtt var endurgreiðsluúrræði frá VMST vegna verkefnafalls en þó fór skrifstofu- og stjórnunarkostnaður 16m fram yfir áætlun eða um 5%, sem skýrist af kostnaði við aðkeypta sérfræðiþjónustu og aukaþing sem fram fór þann 2. október 2021. Inni í aðkeyptri sérfræðiþjónustu er kostnaður við almannatengsl, lögfræðiráðgjöf, nefndarstörf, skýrslugerð og þýðingar. Húsnæðiskostnaður var undir áætlun og sömu sögu er að segja af öðrum rekstrarkostnaði og rekstrargjöldum Laugardalsvallar.
Hagnaður ársins fyrir ráðstöfun til aðildarfélaga var um 120 mkr. en áætlanir gerðu ráð fyrir 182m.

Alls var um 144 mkr úthlutað til aðildarfélaga, sem er í samræmi við áætlanir.
Rekstrarniðurstaða samstæðu Knattspyrnusambands Íslands á árinu er því lækkun á sjóð um 24,4 mkr.

Fjárhagsáætlun 2022

Gert er ráð fyrir að heildartekjur KSÍ árið 2022 verði um 1.668 mkr samanborið við kr. 1.631 árið 2021.

Gert er ráð fyrir að heildargjöld ársins 2022 verði um 1.532 mkr, samanborið við 1.506 mkr árið 2021. Áætluð rekstrarniðurstaða ársins 2022 eftir framlög til aðildarfélaga er um 21 mkr hagnaður.

Í fjárhagsáætlun 2022 er gert ráð fyrir að framlög til aðildarfélaga verði 118 mkr. Framlag KSÍ til barna- og unglingastarfs er áætlað 50 mkr og ennfremur er það tillaga fráfarandi stjórnar að forsendur til úthlutunar verði endurskoðaðar haustið 2022. Þess má geta að árið 2022 kemur í fyrsta sinn frá UEFA framlag til félaga í efstu deild kvenna vegna Meistaradeildar UEFA (kvenna).

Greiðslur vegna leyfiskerfis verði 41,1 mkr. verðlaunafé móta rúmar 8 mkr og þá er gert ráð fyrir að hlutur KSÍ vegna ferðaþátttökugjalds verði tæpar 19 mkr árið 2022.

Hluti þeirra tekna sem UEFA hefur af Meistaradeild karla rennur til félaga í aðildarlöndum UEFA til eflingar knattspyrnu barna og unglinga og fengu félög í Pepsi Max deild karla 87,4 milljónir í sinn hlut.

KSÍ greiddi um 60 mkr til aðildarfélaga (annarra en þeirra sem léku í Pepsi Max deild karla) vegna barna- og unglingastarfs.

Skipting á framlagi var þá með þeim hætti að félög úr Pepsi Max deild karla fengu rúmar 7,2 milljónir kr., félög úr Pepsi Max deild kvenna og Lengjudeildum karla og kvenna fengu 2.400.000 kr., félög úr 2. deild karla fengu 1.500.000 kr., félög úr 3. og 4. deild karla og 2. deild kvenna fengu 1.000.000 kr., og sameiginleg lið í meistaraflokki með barna og unglingastarf fengu 600.000 kr.

Úthlutun var háð því að félög hefðu haldið úti starfsemi í yngri flokkum og urðu félög utan deildarkeppni og félög sem ekki héldu úti starfsemi hjá báðum kynjum að sækja sérstaklega um framlag. Samtals var því framlag til barna- og unglingastarfs fyrir árið 2021 um 146 milljónir króna.

Valur fékk tæpar 120 milljónir fyrir Íslandsmeistaratitil karla 2020, þátttöku í forkeppni Meistaradeildar karla (UEFA Champions League) og forkeppni Sambandsdeildarinnar. Breiðablik, FH og Stjarnan léku í forkeppni Sambandsdeildarinnar. Breiðablik fékk tæpar 127.5 milljónir, FH 81.2 milljónir og Stjarnan tæpar 37 milljónir.

Breiðablik og Valur léku í Meistaradeild kvenna. Breiðablik fékk rúmar 75 milljónir króna fyrir að komast í riðlakeppnina og Valur fékk tæpar 10.5 milljónir króna.

Valur og Víkingur R. fengu greiðslur frá UEFA vegna þátttöku leikmanna sinna í umspili fyrir EM 2020. Alls voru greiðslurnar tæpar 3.5 milljónir (22.614 evrur).

Félög í Pepsi Max deildum, Lengjudeildum og Mjólkurbikar fengu sérstakar greiðslur fyrir sjónvarps- og markaðsréttindi, að upphæð samtals 180 milljónum króna. Innifalið í þessari tölu er verðlaunafé samkvæmt töflunum hér að neðan.

Félög sem taka þátt í Íslandsmóti meistaraflokks skulu greiða ferðaþátttökugjald samkvæmt reglugerð KSÍ. Markmið reglugerðarinnar er að stuðla að auknum jöfnuði félaga gagnvart ferðakostnaði.

Hér má sjá lista yfir þau félög sem fengu greitt vegna ferðakostnaðar árið 2021.